ANO ANG UNANG YAKAP?
Ang Unang Yakap ay ang paglalagay ng bagong panganak na sangglo sa suso ng ina upang umpisahan ang pagpapasuso. Sa pamamagitan nito nalalaman ang kahandaan ng isang ina at sanggol sa pagpapasuso. Ito ay ginagawa upang maiwasan ang komplikasyon ng isang ina at ng sanggol sa pagpapasuso. Ito din ay ginagawa upang maiwasan ang komplikasyon sa bata gaya ng pagbaba ng temperatura, impeksyon at pagbaba ng asukal sa katawan ng bata.
PAGLABAS PO BA NG BATA MAKAKASAMA KO NA KAAGAD SYA SA KWARTO?
Kapag walang komplikasyon ay isinasama na sa ina ang bata. Kapag normal delivery ay pwede ng isama sa loob ng 30-minuto at kapag ceasarian section naman ay sa loob ng 4 na oras, maisasama na sa kwarto ng ina ang sanggol.
NORMAL LANG PO BA NA KAKAUNTI ANG COLOSTRUM, YUNG UNANG GATAS NA LUMALABAS NA GATAS SA INA?
Oo, karamihan ng mga nanay ay nagsisimula sa halos ilang patak lang ng gatas na mayaman sa protina na kung tawagin ay colostrum na lumalaban sa mga infection. Itong gatas na ito ay halos kulay dilaw na mayaman sa beta-carotene. Kadalasan itong makikita sa unang mga araw at sa pagdami ng gatas na lumalabas sa ina ay nagbabago ang kulay nito na tinatawag na transitional milk.
SAPAT BA ANG AKING MAGIGING GATAS PARA SA AKING ANAK?
On the average basis, ang gatas ng ina ay tumatagal sa loob ng unang anim na buwan hanggang isang taon ng pagkapanganak lalo na kung ekslusibo ng pagpapadede kay baby. Maaaring gawin ang pagpapadede sa bata hangga't gusto niya at hindi kailangang mangamba na ang iyong gatas ay hindi magiging sapat.
GAANO AKO KATAGAL PWEDENG MAGPASUSO?
Hangga't maaari ekslusibong pagpapasuso ng gatas ng ina ay sa unang anim na buwan ng pagkapanganak. Maraming benepisyo ang makukuha ng ina at ng sanggol kasama na rito ang pagbuo ng "bond" sa pagitan ng Ina at anak. Maaari itong tumagal ng labindalawang buwan o higit pa kung nanaisin ng nanay at ng bata ang pagpapasuso.
ANO ANG PWEDENG ALTERNATIBO SAKALING HUMINA ANG NALABAS NA GATAS SA AKING SUSO?
Sakaling humina ang gatas ng isang ina maaaring gumamit ng donasyon na gatas galing sa mga nagpapasusong ina. Maaaring ibigay ang gatas gamit ang syringe o sa pamamagitan ng cup feeding. Sa palagian at tuloy tuloy na pagpapasuso ay di hihina ang gatas ng isang ina.
SAAN PO PWEDE MAKAKAKUHA NG BREASTMILK SAKALING HUMINA ANG AKING GATAS?
Maaaring makakuha ng breastmilk sa mga milk bank. Pwede kayong makipagugnayan sa inyong Community Health Center kung saan kayo pwedeng makakuha. Maaari din kayong makakuha sa mga kamag-anak o kakilala na nagpapasuso.
ANO PO BA ANG MOTHER AND BABY FRIENDLY HOSPITAL INITIATIVE?
Ito ay Global Effort na maisasakatuparan ang "practice" na pagprotekta, pagtataguyod at pagsuporta sa layunin ng pagpapasuso ng ina sa kanyang anak sa unang mga taon ng pagkapanganak. Ninanais din nito na lahat ng mga maternity facilities ay sumusuporta sa layunin ng programang ito.
PAANO PO BA ISINASAKATUPARAN ANG MGA PROGRAMANG MBFHI?
Mayroong written policy patungkol sa Breastfeeding na palagiang pinapaalala sa lahat ng mga heatlh care staff upang ito naman ay maipahatid sa lahat na itinuturo pagkatapos malaman ng isang ina at nagdadalang tao. Itong polisiya na ito ay manggagaling sa Department of Health na kanilang ipinapatupad kaisa sa utos ng World Health Organization at UNICEF upang matupad ang pangunahing layunin ng programa na maibigay ang pinakatamang gatas para sa bata.
ANONG KAPARUSAHAN KUNG DI MAKAKASUNOD SA POLISIYA NG DOH?
Kung mahuhulihan ang isang ospital ng tsupon o ano mang artipisyal na gatas maaaring alisin ang license to operate ng naturang institution bukod sa karampatang multa na nagkakahalagang Php 1,000.00 hanggang Php 30,000.00.
